जळगाव : जेडीसीसी बॅंकेच्या पारोळा तालुक्यातील शेळावे बुद्रुक शाखेत 1 व 2 नोव्हेंबरच्या दरम्यान रात्रीच्या वेळी रोकड लुटीचा प्रयत्न झाला. मात्र तिजोरी उघडता न आल्याने त्यातील रोकड सुरक्षीत राहिली. मात्र चोरट्यांनी बॅंकेच्या लोखंडी कपाटातील सामान अस्ताव्यस्त फेकून पोबारा केल्याचे उघडकीस आले आहे.
2 नोव्हेंबरच्या सकाळी बॅंकेच्या मुख्य दरवाज्याचे कुलुप व कडीकोंडा तुटल्याचे लक्षात आले. या घटनेची माहिती पारोळा पोलिस स्टेशनला देण्यात आली. घटनेची माहिती मिळताच पो.नि. रामदास वाकोडे यांनी आपल्या सहका-यांसह घटनास्थळी धाव घेतली. शाखा व्यवस्थापक जिजाबराव पाटील यांनी दिलेल्या फिर्यादीनुसार पारोळा पोलिस स्टेशनला रितसर गुन्हा दाखल करण्यात आला असून पुढील तपास सुरु आहे.
