जळगाव: गावठी पिस्तुल घेऊन दहशत माजविणाऱ्या तुषार सतीश जाधव (२०) रा.सोनीच्छावाडी, भुसावळ याच्यासह एका अल्पवयीन मुलाला स्थानिक गुन्हे शाखेच्या पथकाने बुधवारी सायंकाळी भुसावळ शहरातून पकडले. या दोघांकडून मोटार सायकल देखील हस्तगत करण्यात आली आहे.
याप्रकरणी भुसावळ शहर पोलिसात गुन्हा दाखल करण्यात झाला आहे. भुसावळ शहरातील सोनीच्छावाडी भागात दोन जण गावठी पिस्तुल घेऊन दुचाकीने फिरुन दहशत माजवत असल्याची माहिती पोलिसांना मिळाली होती.
त्यानुसार स्थानिक गुन्हे शाखेचे वरिष्ठ पोलीस निरीक्षक बापू रोहोम यांनी सहायक पोलीस निरीक्षक स्वप्नील नाईक, हवालदार रवींद्र पाटील, दादाभाऊ पाटील, अशोक पाटील व कमलाकर बागुल यांच्या पथकाला रवाना केले होते. या पथकाने पंचमुखी हनुमान मंदिराजवळ संशयाच्या आधारे दुचाकी (क्र.एम.पी.६८ एम.डी.९८०२) अडवली.
तुषारच्या कमरेला गावठी पिस्तुल आढळून आले. त्याच्यासोबतच्या अल्पवयीन मुलाला देखील ताब्यात घेत भुसावळ शहर पोलिसांच्या ताब्यात देण्यात आले.
