मुंबई : धनंजय मुंडे, संजय राठोड यांच्यापाठोपाठ आता थेट शिवसेनेची तोफ आणि संकटमोचक समजले जाणारे संजय राऊत यांच्यावर एका महिलेने आरोप केले आहेत. या प्रकरणी मुंबई उच्च न्यायालयात याचिका देखील दाखल करण्यात आली आहे.
गेल्या सहा ते सात वर्षापासून संजय राऊत हे आपला छळ करत असल्याचे महिलेने न्यायालयात दाखल करण्यात आलेल्या याचिकेत नमुद केले आहे. याशिवाय राऊत यांनी आपल्या पाळतीवर माणसे लावण्यासह हेरगिरी करणे असे विविध आरोप या महिलेने केले आहे. राऊत यांनी आपले राजकीय वजन वापरल्यामुळे त्यांच्यावर पोलिस कारवाई झाली नसल्याचे देखील याचिकेत म्हटले आहे. मुंबई उच्च न्यायालयात दाखल असलेल्या दोन रिट याचिकांपैकी पहिली सुनावणी 4 मार्च रोजी होईल. न्या. संभाजी शिंदे व न्या.मनिष पितळे यांच्या खंडपीठात अ‍ॅड. आभा सिंह यांनी हा अर्ज दाखल केला आहे.
