जालना : शेतीच्या वादातून मुलाने आपल्या पित्याची हत्या केल्याची घटना उघडकीस आली आहे. एलसीबी पथकाच्या तपासात हा प्रकार उघडकीस आला आहे. 4 जानेवारी रोजी पुणेगाव येथील रहिवासी असलेले भाऊसाहेब चव्हाण हे शेतात झोपायला गेले होते. दुस-या दिवशी त्यांचा मृतदेह आढळून आला होता. तपासाअंती स्थानिक गुन्हे शाखेच्या पथकाने मयत भाऊसाहेब चव्हाण यांच्या मुलासह इतर दोघांना अटक केली आहे. अरविंद भाऊसाहेब चव्हाण (35), अनिल अर्जुन अंभोरे (22), सतीष अर्जुन अंभोरे (25) अशी अटक करण्यात आलेल्यांची नावे आहेत.
अरविंद चव्हाण याचे वडील भाऊसाहेब चव्हाण हे मुलगा अरविंद यास शेतजमिनीची विकू देत नव्हते. काही महिन्यांपूर्वी विकलेल्या बैलजोडीचे पैसे त्यांनी दिले नव्हते. यावरून झालेल्या वादातून मुलाने त्यांच्या हत्येचे नियोजन केले होते. भाऊसाहेब चव्हाण शेतात झोपायला गेल्यानंतर मध्यरात्री त्यांचा चाकू व लोखंडी दांड्याने खून करण्यात आला. पुढील तपास पोलीस उप निरीक्षक राठोड करत आहेत.
