जळगाव (क्राईम दुनिया न्युज नेटवर्क): बैलपोळा या सणाला महाराष्ट्रात अनन्य साधारण महत्व आहे. शेतकरी आणि बैल यांचे नाते जपणारा हा सण समजला जातो. महाराष्ट्रात पोळा हा सण सर्वत्र उत्साहाने साजरा केला जातो. जळगाव जिल्ह्याच्या पारोळा तालुक्यातील पळसखेडे बुद्रुक या गावी पोळा सणाची सर्वत्र धामधुम सुरु होती. गावात पोळ्याचा उत्साह… रस्त्यावर सजवलेले बैल… सर्वत्र आनंदाचे वातावरण. मात्र, याच आनंदाच्या दिवशी एका किरकोळ धक्क्याने असा वाद पेटला की, एका अठरा वर्षीय तरुणाला आपला जीव गमवावा लागला. या सणाच्या दिवशी केवळ एका बैलाचा दुस-या बैलाला लागलेला किरकोळ धक्का आणि त्यातून निर्माण झालेल्या वादाची परिणीती एका खूनाच्या घटनेत झाली. मयुर बाळू शिंदे असे मरण पावलेल्या तरुणाचे नाव …..
गुरुवारी दुपारची साडेतीनची वेळ. पोळ्यानिमित्त गावाबाहेरील पळसखेडे-राजवड रस्त्यावर बैल फिरवले जात होते. मयूर शिंदेही आपल्या बैलासोबत तेथे होता. सणाचा उत्साह सुरू असतानाच अचानक एका बैलाचा दुसऱ्या बैलाला किरकोळ धक्का लागला. धक्का छोटा होता…पण त्यावरून निर्माण झालेला वाद मात्र मोठा ठरला. संशयित अंकुश नेहरू पाटील याचा मयूरसोबत वाद झाला. काही क्षणांत परिस्थिती चिघळली. वाद वाढला आणि चाकू बाहेर आला.
सुरुवातीला शाब्दिक वाद असल्याचे सांगितले गेले. मात्र नंतर परिस्थितीने अचानक गंभीर वळण घेतले. पोलिसांत दाखल फिर्यादीनुसार, संशयित अंकुशने मयूरच्या पोटावर चाकूने जोरदार वार केला. क्षणभरापूर्वी सणाच्या वातावरणात बैलांसोबत फिरणारा मयूर…काही क्षणांतच रक्ताच्या थारोळ्यात कोसळला. घटनास्थळी उपस्थित ग्रामस्थांनी धाव घेतली. मयूरला तातडीने पारोळा येथील खासगी रुग्णालयात दाखल करण्यात आले.
पण डॉक्टरांसमोर परिस्थिती गंभीर होती. मयूरची प्रकृती चिंताजनक असल्याने त्याला पुढील उपचारासाठी जळगावला हलवण्याचा निर्णय घेण्यात आला. रुग्णवाहिकेतून त्याला जळगावच्या दिशेने नेले जात होते. कुटुंबीयांसह नातेवाईकांच्या मनात एकच आशा होती—‘मयूर वाचला पाहिजे…’ मात्र, एरंडोलजवळ पोहोचत असतानाच मयूरने अखेरचा श्वास घेतला.
अवघ्या १८ वर्षांच्या तरुणाचा अशा प्रकारे अंत झाल्याने कुटुंबीयांवर दुःखाचा डोंगर कोसळला. एकुलता एक मुलगा… आणि घरातील आनंद क्षणात संपला. मयूर हा आई-वडिलांचा एकुलता एक मुलगा असल्याने त्याच्या मृत्यूची बातमी समजताच कुटुंबीयांना मोठा धक्का बसला. ज्या दिवशी घराघरांत पोळ्याचा सण साजरा होत होता…त्याच दिवशी एका घरातील चिराग कायमचा विझला. गावातही हळहळ व्यक्त करण्यात आली. या घटनेनंतर परिसरात तणावाचे वातावरण निर्माण झाले. घटनेनंतर संशयित आरोपी अंकुश पाटील फरार झाला.
संशयित आरोपीविरुद्ध यापूर्वीही गुन्हे दाखल असल्याचे सांगण्यात येत आहे. त्यामुळे पोलिस त्याच्या पूर्वीच्या गुन्हेगारी पार्श्वभूमीचाही तपास करत आहेत. वाद सुरू झाल्यानंतर चाकू कुठून आला? हल्ल्याच्या वेळी आणखी कोणी उपस्थित होते का? आरोपीने हल्ल्यानंतर कुठे पलायन केले? या सर्व प्रश्नांची उत्तरे शोधण्यासाठी पोलिसांकडून तपास केला जात आहे. संशयित आरोपीला तातडीने अटक करून प्रकरणाचा जलद तपास करावा आणि खटला फास्ट ट्रॅक न्यायालयात चालवावा, अशी मागणी अविनाश पाटील, राजू पाटील यांच्यासह ग्रामस्थांनी केली.
मयूरच्या मृत्यूमुळे गावासमोर एक गंभीर प्रश्न उभा राहिला आहे. एका किरकोळ कारणावरून एखाद्याचा जीव घेण्याइतका राग का वाढतो? धक्का बैलाला लागला होता… पण किंमत एका कुटुंबाने चुकवली. पोळा हा शेतकरी आणि बैलांच्या नात्याचा सण. या दिवशी बैलांची पूजा केली जाते, त्यांच्याप्रती कृतज्ञता व्यक्त केली जाते. पण याच सणाच्या दिवशी एका किरकोळ कारणावरून तरुणाचा जीव जाणे ही अत्यंत वेदनादायक बाब आहे.
वाद झाला तर काही क्षण थांबणे, रागावर नियंत्रण ठेवणे आणि परिस्थिती शांत करणे—इतक्याशा संयमाने कदाचित एक जीव वाचू शकतो. कारण रागाचा एक क्षण…हातातील एक शस्त्र…आणि त्यानंतर होणारी एक चूक…संपूर्ण आयुष्य उद्ध्वस्त करू शकते. मयूरचे आयुष्य परत येणार नाही. त्याच्या आई-वडिलांचा एकुलता एक मुलगा परत येणार नाही. आणि आरोपी दोषी ठरल्यास, एका क्षणाच्या कथित संतापाची शिक्षा त्यालाही दीर्घकाळ भोगावी लागू शकते. म्हणूनच या घटनेचा सर्वात मोठा धडा एकच—‘किरकोळ वाद जिंकण्यापेक्षा, तो वाद तिथेच थांबवणे अधिक महत्त्वाचे आहे.’ या घटनेचा पुढील तपास पारोळा पोलिस स्टेशनचे पोलिस निरीक्षक दीपक पाटील यांच्या मार्गदर्शनाखाली सुरू आहे.
