अकोला : अकोला येथील दहीहंडा पोलिस स्टेशनचे पोलिस निरीक्षक प्रकाश अहिरे यांना लाच देणा-या तिघा जुगार अड्डा चालकांना अटक करण्यात आली आहे. जुगार अड्डा चालवण्यासाठी दरमहा पन्नास हजार रुपयांची लाच देऊ करणा-या तिघा जुगार माफीयांना अकोला एसीबीच्या पथकाने अटक केली आहे. लाच देणारेच या रिव्हर्स ट्रॅपमधे अडकल्याने अकोला शहर व जिल्ह्यात खळबळ माजली आहे. शिवा गोपाळराव मगर, अभिजीत रविकांत पागृत व घनश्याम गजानन पागृत अशी अटक करण्यात आलेल्या तिघा जुगार अड्डा चालकांची नावे आहेत. लाच देतांना एसीबी पथकाने तिघांना रंगेहाथ अटक केली आहे.
