इस्टाग्रामवर तरुणी बनून रचला सुडाचा सापळा! – गोळीबार करणा-यांच्या सापळ्याचा झाला भोपळा!!

जळगाव (क्राईम दुनिया न्यूज नेटवर्क) – कधी कधी मृत्यू समोरून येत नाही… तो एखाद्या अनोळखी चेहऱ्याच्या रूपाने मोबाईलच्या स्क्रीनवर अवतरतो! सुरुवातीला एक साधी फ्रेंड रिक्वेस्ट येते… मग हळूहळू ओळख वाढते… गोड गप्पा रंगतात… मेसेज आणि फोन कॉल्सचा सिलसिला सुरू होतो… आणि एक दिवस भेटण्याचे निमंत्रण मिळते! समोरच्या व्यक्तीवर विश्वास ठेवून आपण भेटायला निघतो पण त्या भेटीच्या ठिकाणी आपली वाट पाहत कोण उभे आहे, याची कल्पनाही नसते!

जळगाव जिल्ह्यातील वरणगाव परिसरात असाच एक भयानक प्रकार समोर आला. इन्स्टाग्रामवर एका तरुणीच्या नावाने खाते तयार करण्यात आले. त्यावरून 24 वर्षीय सरफराज सय्यद याच्याशी संवाद साधण्यात आला. मैत्रीच्या आभासी जाळ्यात त्याला ओढण्यात आले आणि अखेर भेटण्याच्या बहाण्याने फुलगाव उड्डाणपुलाखाली बोलावण्यात आले. पण तिथे ना कोणती तरुणी होती, ना मैत्रीचा गोडवा! तिथे होते दोन हल्लेखोर… हातात लोखंडी सळई… आणि कमरेला लपवलेला गावठी कट्टा! ज्या भेटीला सरफराज गेला होता, ती भेट त्याच्यासाठी प्राणघातक हल्ल्याच्या दारापर्यंत घेऊन जाणारी ठरली. डोक्यावर सळईचे वार झाले, पायावर हल्ला झाला आणि त्यानंतर दोन गोळ्या झाडण्यात आल्या. पण या रक्तरंजित हल्ल्यामागचे कारण केवळ वैयक्तिक वैर नव्हते. त्यामागे होता काही वर्षांपूर्वीचा अपमान, मनात साठवलेला राग आणि सूड घेण्यासाठी आखलेला थंड डोक्याचा कट!

या कटाचा पर्दाफाश करताना जळगाव स्थानिक गुन्हे शाखेने इन्स्टाग्रामच्या पडद्यामागे लपलेल्या दोन संशयितांना ताब्यात घेतले आहे. मात्र, या संपूर्ण प्रकरणातील काही गोष्टी ऐकून कोणाच्याही अंगावर काटा आल्याशिवाय राहणार नाही!

प्रकरणाची सुरुवात एका अनोळखी इन्स्टाग्राम खात्यापासून…17 ऑक्टोबर 2026! सरफराज सय्यद याने @ashwi_ni2083 या इन्स्टाग्राम खात्याला रिक्वेस्ट पाठवली. त्यानंतर या खात्यावरून त्याच्याशी संवाद सुरू झाला. समोरून बोलणारी व्यक्ती तरुणी असल्याचे भासवण्यात येत होते. हळूहळू मेसेज वाढू लागले. संवादात जवळीक निर्माण होऊ लागली. सरफराजला कदाचित ही एक सामान्य सोशल मीडिया ओळख वाटत होती. मात्र, या खात्याच्या मागे कोण आहे आणि त्याचा खरा हेतू काय आहे, याची त्याला कल्पना नव्हती.

1 नोव्हेंबर 2026 रोजी सकाळी साडेदहा वाजल्यापासून पुन्हा चॅटिंग सुरू झाले. दिवसभर संवाद सुरू ठेवण्यात आला. आणि मग संध्याकाळी भेटण्याचा विषय निघाला. ठिकाण ठरले वरणगाव येथील फुलगाव उड्डाणपुलाखालील सर्व्हिस रोड! तरुणी आपल्याला भेटण्यासाठी बोलावत आहे असे समजून सरफराजची कळी खुलली. सरफराजनेह भेटण्यासाठी लागलीच होकार दिला. त्याला काय माहीत, की ज्या व्यक्तीशी तो इतके दिवस संवाद साधत होता, तिच्या नावाचा वापर करून त्याच्यासाठी एक भयानक सापळा तयार करण्यात आला आहे!

संध्याकाळचे सात वाजले… अन् मैत्रीचा मुखवटा गळून पडला! 1 नोव्हेंबरची संध्याकाळ. घड्याळात साधारण सात वाजले होते. सरफराज ठरलेल्या ठिकाणी पोहोचला. मात्र, तिथे त्याच्या स्वागतासाठी कोणी तरुणी नव्हती. त्याऐवजी मोटारसायकलवरून आलेले दोन इसम त्याच्यासमोर आले. क्षणाचाही विलंब न करता त्यांनी सरफराजवर हल्ला चढवला. लोखंडी सळईने डोक्यावर सलग दोन वार करण्यात आले. अचानक झालेल्या हल्ल्याने सरफराज खाली कोसळला. त्यानंतर पायावरही वार करण्यात आले. मात्र, हल्लेखोरांचा संताप अजून शांत झाला नव्हता. त्यातील भूषण उर्फ बिस्ला सावळे याने कमरेला लावलेला गावठी कट्टा बाहेर काढला आणि सरफराजच्या दिशेने दोन राऊंड गोळीबार केला. काही क्षणांत सर्वकाही संपल्यासारखे झाले. हल्लेखोरांनी मोटारसायकलने घटनास्थळावरून पळ काढला.

एका बाजूला गंभीर जखमी सरफराज, तर दुसऱ्या बाजूला अंधाराचा फायदा घेत पसार झालेले हल्लेखोर! वरणगाव परिसरात या घटनेने एकच खळबळ उडाली. हल्लेखोरांना वाटले खाते बंद केले की सगळे संपले! घटना घडल्यानंतर पोलिसांसमोर सर्वात मोठा प्रश्न होता तो म्हणजे हल्लेखोरांचा शोध कसा घ्यायचा? कारण, ज्या इन्स्टाग्राम खात्याच्या माध्यमातून सरफराजला भेटायला बोलावण्यात आले होते, ते खाते हल्ल्यानंतर अवघ्या ४५ मिनिटांत बंद करण्यात आले होते. हल्लेखोरांना वाटले असावे की सोशल मीडियावरील खाते बंद झाले की पोलिसांना कोणताही पुरावा मिळणार नाही. पण डिजिटल जगात पुरावे इतक्या सहजपणे नाहीसे होत नाहीत!

पोलीस अधीक्षक श्रीकांत धिवरे यांनी घटनेचे गांभीर्य लक्षात घेऊन स्थानिक गुन्हे शाखेला समांतर तपासाचे आदेश दिले. एलसीबी आणि सायबर पथकाने तांत्रिक तपास सुरू केला. बंद करण्यात आलेल्या इन्स्टाग्राम खात्याचा मागोवा घेण्यात आला. त्याच्या निर्मितीसाठी आणि वापरासाठी कोणत्या ई-मेलचा आधार घेण्यात आला होता, याचा शोध घेण्यात आला. आणि अखेर तपासाला महत्त्वाचा धागा मिळाला! या खात्याच्या वापरासाठी भूषण उर्फ बिस्ला राजू सावळे याने आपल्या अल्पवयीन मित्राच्या मोबाईलमधील ई-मेलचा वापर केल्याचे तांत्रिक विश्लेषणातून समोर आले. म्हणजेच तरुणीच्या नावाने चालणाऱ्या खात्याच्या मागे दुसराच चेहरा लपलेला होता!

पोलिसांनी दोघांना पकडले… आणि सूडाची कहाणी समोर आली! तांत्रिक पुराव्यांच्या आधारे स्थानिक गुन्हे शाखेने फेकरी येथील दोन संशयितांना ताब्यात घेतले. भूषण उर्फ बिस्ला राजू सावळे आणि सिद्धार्थ रामदास ढिवरे. दोघांची चौकशी सुरू झाली आणि या गोळीबारामागील कारण समोर येऊ लागले.

पोलिसांच्या तपासानुसार, या हल्ल्याचे मुळ एका जुन्या वादात दडले होते. हा वाद केवळ रागापुरता मर्यादित राहिला नव्हता. अपमानाची भावना मनात कायम होती आणि त्यातून बदला घेण्याचा विचार तयार झाला होता. एका अपघाताने सुरू झालेला वाद गोळीबारापर्यंत गेल्याचे उघडकीस आले.

पोलिसांच्या माहितीनुसार, 18 एप्रिल 2025 रोजी बोदवड-मुक्ताईनगर महामार्गावर एका वाहनाचा अपघात झाला होता. या अपघाताच्या वेळी सिद्धार्थ ढिवरे आणि भुषण सावळे यांचा सरफराज सय्यद व त्याच्या मित्रांशी वाद झाला. हा वाद वाढत गेला आणि त्याचे रूपांतर मारहाणीत झाले.

सरफराज आणि त्याच्या मित्रांनी गोळीबाराच्या या घटनेतील दोघा संशयीत आरोपींच्या वाहनाची तोडफोड केली आणि त्यांना काठ्यांनी मारहाण केल्याचा आरोप आहे. एवढेच नव्हे, तर या घटनेचा व्हिडीओही तयार करण्यात आला होता. या घटनेमुळे दोघा संशयीत आरोपींचा अपमान झाला. मनात राग साठत गेला. पोलिसांत तक्रार देण्याऐवजी त्या अपमानाचा बदला घ्यायचा, असा कट आखण्यात आल्याचे चौकशीत समोर आले.

मात्र, या बदल्याचा मार्ग त्यांनी निवडला तो अत्यंत भयानक होता. मैत्रीचा मुखवटा घालून आखण्यात आला मृत्यूचा कट! सरफराजला थेट सामोरे जाण्याऐवजी त्याला विश्वासात घेण्याचा मार्ग निवडण्यात आला.

भुषणने आपल्या मैत्रिणीशी संवाद साधण्यासाठी तयार केलेल्या @ashwi_ni2083 या इन्स्टाग्राम खात्याचा वापर सरफराजशी संपर्क साधण्यासाठी करण्यात आला. तरुणीच्या नावाने संवाद साधायचा, त्याचा विश्वास संपादन करायचा आणि योग्य वेळी भेटायला बोलवायचे, अशी योजना आखण्यात आल्याचे पोलिसांच्या तपासात निष्पन्न झाले.

1 नोव्हेंबर रोजी सकाळपासून चॅटिंग सुरू ठेवण्यात आले. संध्याकाळी भेटण्याचे ठिकाण निश्चित झाले. त्यानंतर सिद्धार्थ आणि भुषण मोटारसायकलवरून घटनास्थळी पोहोचले. सरफराज दिसताच त्याच्यावर हल्ला करण्यात आला. डोक्यावर सळईचे वार, पायावर हल्ला आणि त्यानंतर झाले गोळीबाराचे दोन राऊंड! यातून दोघा संशयीत आरोपींच्या मनात किती काळापासून सूडाची भावना धुमसत होती, याची कल्पना येते.

या प्रकरणात आणखी एक महत्त्वाचा मुद्दा तपासात पुढे आला. गुन्ह्यात वापरण्यात आलेल्या गावठी कट्ट्याबाबत विचारणा केली असता, भुषणने हा कट्टा त्यांचा पूर्वीचा साथीदार मयत सागर कहार याने दिल्याचे सांगण्यात आले. सागर कहार याचा अपघातात मृत्यू होण्यापूर्वी त्याने हा कट्टा भुषणकडे दिला होता, अशी माहिती तपासात समोर आली. सागरविरुद्ध भुसावळ शहर पोलीस ठाण्यात आर्म्स अॅक्ट आणि सरकारी नोकरावर हल्ला केल्याप्रकरणी गुन्हे दाखल असल्याचेही पोलिसांनी सांगितले. आता या कट्ट्याचा स्रोत, गुन्ह्यात वापरलेली मोटारसायकल आणि मोबाईल याबाबत पुढील तपास सुरू आहे.

या प्रकरणाचा तपास स्थानिक गुन्हे शाखेचे वरिष्ठ पोलीस निरीक्षक राहुल गायकवाड यांच्या नेतृत्वाखाली करण्यात आला. पोलीस अधीक्षक श्रीकांत धिवरे, अपर पोलीस अधीक्षक संदीप गावीत, उपविभागीय पोलीस अधिकारी नितीन गणापुरे आणि नंदराज पाटील यांच्या मार्गदर्शनाखाली पथकाने काम केले. या कारवाईत पोलीस उपनिरीक्षक सोपान गोरे, दीपक जगदाळे, जितेंद्र वल्टे, संतोष पवार, सायबर पोलीस ठाण्याचे पोलीस उपनिरीक्षक मुस्तफा मिर्झा आणि स्थानिक गुन्हे शाखेतील इतर अधिकारी व अंमलदार सहभागी होते. दोन्ही संशयितांना पुढील कायदेशीर कारवाईसाठी वरणगाव पोलिसांच्या ताब्यात देण्यात आले आहे.

या घटनेतून आपण काय शिकणार? या घटनेतील सर्वात भयानक गोष्ट म्हणजे हल्लेखोरांनी शस्त्राचा वापर करण्यापूर्वी विश्वासाचा वापर केला! आज प्रत्येकाच्या हातात स्मार्टफोन आहे. इन्स्टाग्राम, फेसबुक, व्हॉट्सॲप यांसारख्या माध्यमांवर दररोज शेकडो अनोळखी लोकांशी संपर्क येतो. एखादी व्यक्ती सुंदर फोटो लावते, गोड बोलते, सतत मेसेज करते म्हणून ती आपली विश्वासू झाली असे समजणे ही मोठी चूक ठरू शकते. सोशल मीडियावर दिसणारा चेहरा आणि प्रत्यक्ष आयुष्यातील व्यक्ती एकच असेल, याची खात्री नसते.

या घटनेतून काही महत्त्वाचे धडे मिळतात. अनोळखी व्यक्तींच्या फ्रेंड रिक्वेस्ट स्वीकारताना काळजी घ्या. सोशल मीडियावर ओळख झालेल्या व्यक्तीला आपली वैयक्तिक माहिती, पत्ता किंवा लोकेशन सहज देऊ नका. केवळ ऑनलाइन ओळखीच्या आधारावर निर्जन ठिकाणी भेटायला जाऊ नका. धमक्या, ब्लॅकमेलिंग किंवा संशयास्पद संवाद आढळल्यास त्याचे पुरावे जतन करा आणि पोलिसांना कळवा. कोणाशीही जुना वाद असेल, तर त्याचा बदला घेण्यासाठी हिंसेचा मार्ग निवडू नका. कायद्याचा मार्ग स्वीकारा.

या घटनेत आणखी एक गंभीर सामाजिक प्रश्न दडलेला आहे. काही वर्षांपूर्वी झालेल्या एका वादातून मनात अपमानाची भावना निर्माण झाली. तो अपमान विसरण्याऐवजी सूडाची आग मनात जिवंत ठेवण्यात आली. आणि त्या आगीत एका तरुणाचा जीव धोक्यात घालण्यात आला.

शेवटी प्रश्न असा आहे की, एका जुन्या भांडणाचा बदला घेण्यासाठी आणखी एक गंभीर गुन्हा करणे कितपत योग्य आहे? अपमानाचा बदला गोळ्यांनी घेतला जात नाही. रागाचा शेवट रक्ताने केला जात नाही. आणि सोशल मीडियाचा वापर मैत्रीसाठी व्हायला हवा, कोणाच्या आयुष्याशी खेळण्यासाठी नाही! आज सरफराज या हल्ल्यात गंभीर जखमी झाला. उद्या अशा एखाद्या बनावट ओळखीच्या जाळ्यात दुसरा कोणी अडकू नये, हीच अपेक्षा…. मोबाईलच्या स्क्रीनवर आलेला प्रत्येक मेसेज निरुपद्रवी नसतो. कधी कधी एका फ्रेंड रिक्वेस्टच्या मागे मैत्री नसते, तर सूडाचा सापळा लपलेला असतो!