घाटंजी (यवतमाळ) : शिवजयंती उत्सव समिती व राजे छत्रपती सामाजिक संस्था घाटंजीच्या वतीने दिला जाणारा वीर राजे संभाजी पुरस्कार हजारो घाटंजीकरांच्या साक्षीने व्यसनमुक्ती सम्राट तथा प्रबोधनकार मधूकरराव खोडे यांना वितरित करण्यात आला.
कार्यक्रमाच्या अध्यक्षस्थानी आर्णी विधानसभेचे आमदार प्रा. राजू तोडसाम होते. तर प्रमुख अतिथी म्हणून पद्मश्री सुभाष शर्मा, डॉ. अरविंद भुरे, भाजपाचे सुरेश डहाके, मधुकर काठोळे, आसाराम चव्हाण सह मान्यवर उपस्थित होते.
सत्काराला उत्तर देतांना मधुकरराव खोडे म्हणाले की, कोणी सांगते म्हणून व्यसन सोडू नका आपल्या कुटुंबाकडे पहा व व्यसनांचा त्याग करा. व्यसनामुळे तुमचा जीव गेला तर तुमच्या मुलाबाळाची, पत्नीची होणारी आबाळ जरा आठवा आणि सर्वांच्या भल्यासाठी सुंदर निरोगी जीवन जगण्यासाठी व्यसनाचा त्याग करा. सर्व संतांनी महामानवांनी मिळालेले जीवन उत्तमरीत्या जगण्यासाठी आपणाला मार्ग दाखवला आहे. त्या मार्गावरच मार्गाक्रमण केले तर आपली प्रगती शक्य आहे. अध्यक्षीय भाषणात आमदार राजू तोडसाम यांनी खोडे महाराजांच्या कार्याचा गौरव केला व व घाटंजी शहरामध्ये छत्रपती शिवरायांच्या पूर्णाकृती पुतळ्याच्या उभारणी संबंधी शिवजयंती उत्सव समितीने सातत्याने केलेल्या पाठपुराव्याला लवकरच यश येणार असल्याची घोषणा केली. पहिल्या सत्रात प्रा. प्रवीण देशमुख यांचे जगातील सर्वोच्च आदर्शांचा मानबिंदू छत्रपती शिवराय या विषयावर व्याख्यान झाले.
शिव जयंती उत्सवामध्ये सन्मान कर्तृत्वाचा हा सोहळा पार पडला. यामध्ये यवतमाळ जिल्ह्यातून उत्कृष्ट कार्य करणाऱ्या विभूतींचा सन्मान करण्यात आला. अन्न सुरक्षा अधिकारी प्रणय कांबळे, आंतरराष्ट्रीय धावपटू भगवान चायरे, ज्योती कॅन्सर रिलीफचे सतीश मुस्कंदे, सीए केतन मुनोत व आवेश तंवर यांचा या प्रसंगी सत्कार करण्यात आला.
सामान्य ज्ञान स्पर्धा व वेशभूषा स्पर्धा शिव तीर्थावर पार पडली. मान्यवरांच्या हस्ते सर्व स्पर्धांचे बक्षीस वितरण पार पडले व त्यानंतर झी. टीव्ही हास्य सम्राट फेम सिद्धार्थ खिल्लारे व वऱ्हाडी कवी जयंत चावरे यांच्या धमाल विनोद विनोदी कार्यक्रमाने शिवजयंती उत्सवाची सांगता करण्यात आली. दोन दिवस चाललेल्या शिवजयंती उत्सवाच्या विविध सत्रांचे संचालन दीपक महाकुलकर, रुपेश कावलकर, कुलदीप डंभारे यांनी तर प्रास्ताविक राजेश उदार यांनी केले. कार्यक्रमाच्या यशस्वीतेसाठी राहुल खर्चे, अनिल मस्के, राजू गिरी, आकाश चिल्कावार, शरद सोयाम, भास्कर वेट्टी पुष्कर राऊत, अंकुश सलाम यांचे सह सर्व आयोजन समितीने परिश्रम घेतले.
