घाटंजी (यवतमाळ) : दारव्हा तालुक्यातील हरु येथील फिर्यादी तुळशीराम गावंडे यांनी दारव्हा पोलीस ठाण्यात तक्रार दिली की, फिर्यादी हा २५ जानेवारी २०२५ रोजी त्याचे खात्यातुन पैसे काढण्याकरिता दारव्हा येथील एसबीआय बॅकेच्या एटीएम मध्ये गेले असता, तेथे पैसे काढत असतांना एक दोन वेळा प्रयत्न करूनही एटीएम कार्ड काम करत नसल्याने त्याचे जवळ उभा असलेला अनोळखी इसम पाहत होता. त्याच वेळी अज्ञात इसमाने एटीएम मधून पैसे काढण्याची प्रक्रिया सांगीतली. एटीएम कार्ड साथ देत नसल्याने अज्ञात इसमाने कार्डची हेरा फेरी करुन एटीएम कार्ड बदलून दुसरे एटीएम कार्ड फिर्यादी तुळशीराम गावंडे यांस परत दिले. तसेच विविध ठिकाणावरुन त्याचे खात्यातुन १ लाख १५ रुपये विड्राल केल्याचे लक्षात आल्याने फिर्यादी तुळशीराम गावंडे यांनी दारव्हा पोलीस ठाण्यात तक्रार दाखल केली. त्यावरुन अज्ञात आरोपी विरुद्ध अपराध क्रं. ५९/२०२५ अंतर्गत कलम ३१८ (४) अन्वये गुन्हा नोंद करण्यात आला. तसेच अवधुतवाडी पोलीस ठाण्यात अशाच प्रकारे गुन्हा केल्याने अपराध क्रं. ११०/२०२५ भारतीय न्याय संहिता कलम ३१८ (४) अंतर्गत दुसरा गुन्हा नोंदविण्यात आला.
विशेष म्हणजे दोन्ही गुन्ह्याचा तपास करत असतांना सर्व तांत्रिक बाबी पडताळल्या असता, अशा पद्धतीने गुन्हे करणारी आंध्रप्रदेश व कर्नाटक येथील आरोपीतांची टोळी यवतमाळ येथे आल्याचे निष्पन्न झाले. यवतमाळचे पोलीस अधीक्षक कुमार चिंता यांचे मार्गदर्शन व सुचना स्थानिक गुन्हे शाखेचे पोलीस निरीक्षक सतीष चवरे व अनिधस्त पथकातील पोलीस अधिकारी आंध्रप्रदेश व कर्नाटक येथे आरोपींचा शोध घेण्यासाठी रवाना करण्यात आले. या वेळी स्थानिक गुन्हे शाखेच्या पथकाला गोपनीय माहिती मिळाली की, नामे एस. कृष्णमुर्ती (रा. कोकंणती जि. अंतपूर) याने केए. ३२ डी. ५८८१ या वाहनाने त्याचे साथीदारांसह महाराष्ट्र व इतर राज्यात जाऊन एटीएम कार्ड बदलून पैसे काढुन फसवणुकीचे गुन्हे केले आहे. त्यावरुन मोहन्ना चिंताला (वय ३०), कृष्ण मलप्पा भिमनळीकर (वय ३०) यांची चौकशी करण्यात आली. मात्र, एस. कृष्णमुर्ती हा फरार असल्याचे सांगण्यात आले. वरील दोन्ही आरोपीकडून गुन्ह्यातील फसवणूकीची रक्कम १ लाख २० हजार रुपये व गुन्ह्यात वापरलेले चार चाकी वाहन केए. ३२ डी. ५८८१ अंदाजे किंमत ५ लाख रुपये व मोबाईल ५००० असा एकूण ६ लाख २५ हजार रुपयाचा मुद्देमाल जप्त केला. आरोपी क्रंमाक २ व ३ यांनी अशा प्रकारे नागपूर व इतर ठिकाणी गुन्हे केल्याचे कबुल केले आहे.
सदरची कारवाई यवतमाळ पोलीस अधीक्षक कुमार चिंता, अपर पोलीस अधीक्षक पियुष जगताप, एलसीबी चे पोलीस निरीक्षक सतिष चवरे यांच्या मार्गदर्शनात स्थानिक गुन्हे शाखेचे सहाय्यक पोलीस निरीक्षक विजय महाले, पोलीस अंमलदार बबलु चव्हाण, सोहेल मिर्झा, किशोर झेंडेकर, मिथुन जाधव, अमित झेंडेकर, जितेंद्र चौधरी व अमित कुमरे आणि सायबर सेलचे प्रणय ईटकर, प्रगती कांबळे, रोशनी जोगडेकर आदींनी यशस्वीपणे पार पाडली.
