बुरहानपूर (संजय यावलकर) : रात्रीची वेळ… इच्छादेवी मंदिर परिसरात शांतता… सगळीकडे अंधार… आणि अचानक मंदिराच्या दिशेने तीन जण येतात. त्यांच्या हालचाली संशयास्पद होत्या. काही क्षणांत ते मंदिरात दाखल झाले.

पण पुढे जे घडलं, ते पाहून कोणाच्याही अंगावर काटा येईल. मंदिरात शिरल्यानंतर या संशयितांनी थेट इच्छादेवीच्या मूर्तीसमोर जाऊन चरणस्पर्श केला. काही क्षण तेथे थांबले… आणि त्यानंतर सुरू झाली चोरी!

देवीच्या मस्तकावरील चांदीची पॉलिश केलेला मुकुट आणि छत्र काढण्यात आले. मौल्यवान वस्तू घेऊन ते बाहेर पडू लागले. पण इथेच या घटनेला एक वेगळंच वळण मिळालं…

मंदिरातून बाहेर पडण्याआधी चोरट्यांनी पुन्हा देवीच्या चरणांना स्पर्श केला! – चोरी करण्यासाठी आलेले हेच हात काही क्षणांपूर्वी देवीच्या चरणांवर टेकले होते आणि आता त्याच हातांनी मंदिरातील वस्तू लंपास केल्या होत्या. प्रवेश करताना चरणस्पर्श आणि चोरी केल्यानंतरही चरणस्पर्श—सीसीटीव्हीतील हा प्रकार पाहून परिसरातील नागरिकही हैराण झाले आहेत.

मध्यरात्रीचा तो एक वाजताचा थरार

ही घटना 12 सप्टेंबरच्या रात्री सुमारे एक वाजता घडल्याचे सांगितले जाते. इच्छापूर येथील प्रसिद्ध इच्छादेवी मंदिरात तीन संशयित दाखल झाल्याचे सीसीटीव्ही फुटेजमध्ये दिसून येत आहे.

मंदिरातील देवीच्या नाकात सोन्याची लौंग आणि गळ्यात सोन्याचे मंगळसूत्र असल्याची माहिती आहे. मात्र चोरट्यांना ही दागिने नेता आले नाहीत.

मग प्रश्न उभा राहतो – चोरट्यांचा नेमका उद्देश काय होता?
त्यांनी मुकुट आणि छत्रच का नेले? आणि चोरी करून निघताना पुन्हा देवीचे चरण का स्पर्शले? या प्रश्नांची उत्तरे आता पोलिसांच्या तपासातून समोर येणार आहेत.

सीसीटीव्ही ठरणार महत्त्वाचा धागा

घटनेची माहिती मिळाल्यानंतर शाहपूर पोलिसांनी तपासाला सुरुवात केली आहे. ठाणे प्रभारी अखिलेश मिश्रा यांच्या माहितीनुसार मंदिरात चोरीची घटना घडली असून, पोलिसांकडून आरोपींचा शोध घेतला जात आहे. सीसीटीव्ही फुटेजमध्ये कैद झालेल्या संशयितांच्या हालचालींच्या आधारे त्यांची ओळख पटविण्याचे प्रयत्न सुरू आहेत. पोलिसांसमोर आता सर्वात मोठे आव्हान आहे ते म्हणजे—सीसीटीव्हीत दिसणाऱ्या या तीन संशयितांपर्यंत पोहोचणे.

श्रद्धास्थानात चोरीने संताप

इच्छादेवी मंदिर हे परिसरातील भाविकांचे श्रद्धास्थान आहे. त्यामुळे मंदिरात चोरी झाल्याची बातमी समोर येताच भाविकांमध्ये संताप आणि चिंता व्यक्त होत आहे. धार्मिक स्थळाच्या सुरक्षेवरही या घटनेमुळे प्रश्न उपस्थित झाले आहेत. मंदिर परिसरात रात्रीची सुरक्षा अधिक कडक करण्याची मागणीही होऊ शकते. पण या संपूर्ण घटनेतील सर्वात गूढ दृश्य मात्र तेच…

देवीसमोर माथा टेकवला…
मुकुट आणि छत्र घेतले…
आणि निघतानाही पुन्हा चरणस्पर्श केला!

आस्था आणि अपराध यांचा हा विचित्र संगम कॅमेऱ्यात कैद झाला आहे. आता सीसीटीव्हीतील त्या तीन चेहऱ्यांमागचं रहस्य उलगडणार का? इच्छादेवी मंदिरातील चोरीचा हा थरारक अध्याय आरोपींच्या अटकेनंतरच पूर्ण होणार आहे.