जळगाव (क्राईम दुनिया न्युज नेटवर्क) – आठशे रुपये… रक्कम छोटी होती, पण त्याच पैशांसाठी दोन मद्यपींमध्ये सुरू झालेला वाद एकाच्या मृत्यूवर जाऊन थांबला. दिवसभर काड्यामुळ्या आणि नकली रुद्राक्ष विकून उदरनिर्वाह करणारा जुगा पवार. त्याला कदाचित कल्पनाही नसेल की, दिवसभराच्या मेहनतीतून मिळालेली कमाई त्याच्यासाठी मृत्यूचे कारण ठरेल.
रेल्वेचा प्रवास, सोबत केलेले मद्यपान, पैशांची मागणी, वाढत गेलेला वाद आणि अखेरीस दगडाने केलेला जीवघेणा हल्ला… या सगळ्या घटनांनंतर समोर आलेले एक विचित्र दृश्य पोलिसांनाही तपासाची दिशा देणारे ठरले. संशयिताच्या बॅगेत आढळली ती मृत जुगा याच्या दातांची उपटलेली बत्तीशी!
21 सप्टेंबर 2026 रोजी भडगाव पोलिस स्टेशन हद्दीतील नगरदेवळा परिसरात ही घटना उघडकीस आली. या घटनेने पैशांच्या हव्यासातून माणसाचे माणुसकीशी असलेले नाते किती भयावह पद्धतीने तुटू शकते, याची जाणीव करून दिली.
नगरदेवळा परिसरात जुगा पवार आणि धर्मा पवार हे एकमेकांच्या घराजवळ राहत होते. दोघांनाही मद्यपानाचे, नशाखोरीचे व्यसन होते. जुगा काड्यामुळ्या आणि नकली रुद्राक्ष विकून आपला चरितार्थ चालवत होता. त्याच्या आयुष्यात श्रीमंती नव्हती. मात्र दिवसभर रस्त्याच्या कडेला बसून काड्यामुळ्या आणि नकली रुद्राक्ष विकून मिळणाऱ्या पैशांतून घरखर्च भागवण्याचा त्याचा प्रयत्न सुरू होता.
21 सप्टेंबरची सकाळ उजाडली. जुगा घरातील आवश्यक सामान आणण्यासाठी सकाळी दहाच्या सुमारास पॅसेंजर रेल्वेने पाचोऱ्याला गेला. पाचोऱ्यात पोहोचल्यानंतर त्याने नेहमीप्रमाणे काड्यामुळ्या आणि रुद्राक्ष विकण्यास सुरुवात केली. दिवसभराच्या विक्रीनंतर त्याच्या खिशात आठशे रुपये जमा झाले. त्याने घरासाठी लागणारे काही सामान घेतले आणि त्याने नगरदेवळ्याला परतण्याचा मार्ग धरला.
पण या प्रवासात त्याच्या खिशातील आठशे रुपयांवर त्याच्या घराजवळ राहणा-या धर्मा पवार याची नजर टपलेली होती. त्यासाठी धर्मा हा जुगाचा पाठलाग आणि पिच्छा करत होता. धर्मा पवार याला जुगा याच्याकडे आठशे रुपये असल्याची माहिती होती. धर्मा त्याच्याकडे या पैशांची मागणी करत होता. जुगा पैसे देण्यास तयार नव्हता. जुगा आपल्या घराकडे परतत होता. त्याच्यासोबत दिवसभराच्या कमाईतून घेतलेले सामान होते. दुसरीकडे, आठशे रुपये मिळवण्याच्या मागणीवरून दोघांमधील तणाव वाढत चालला होता.
नगरदेवळा रेल्वेस्थानकाजवळ दोघांनी एकत्र मद्यपान केले. काही काळासाठी वातावरण सामान्य असल्याचे वाटले असेल. पण पुन्हा आठशे रुपयांचा विषय निघाला आणि वादाने गंभीर वळण घेतले. एका बाजूला काड्यामुळ्या विक्रीतून मिळालेली रक्कम न देण्याचा जुगा याचा निर्धार, तर दुसऱ्या बाजूला ती रक्कम मिळवण्याचा धर्माचा आग्रह! आठशे रुपयांचा प्रश्न सुटण्याऐवजी त्याने हिंसक रूप धारण केले.पोलिसांत दाखल गुन्ह्यानुसार, धर्मा पवार याने जुगा याच्यावर दगडाने हल्ला केला. या हल्ल्यात जुगा याचा मृत्यू झाला.
काही क्षणांपूर्वी जिवंत असलेला जुगा रक्ताच्या थारोळ्यात पडला. ज्या हातांनी दिवसभर काड्यामुळ्या विकून आठशे रुपये जमवले होते, त्याच आयुष्याचा अंत एका हिंसक वादात आणि रक्तरंजीत घटनेत झाला. मात्र या घटनेतील सर्वाधिक अस्वस्थ करणारा तपशील पुढे आला. धर्मा याने जुगाच्या दातांची बत्तीशी काढून घेतली आणि ती स्वतःच्या बॅगेत ठेवली. त्यानंतर त्याने घटनास्थळावरून पलायन केले.
दिवस सरत गेला. संध्याकाळ झाली आणि रात्रही पुढे सरकू लागली. जुगाच्या शवानजीक कुत्री भुंकत होती. जुगा घरी न परतल्याने त्याच्या कुटुंबीयांची चिंता वाढली होती. रात्री दहाच्या सुमारास जुगा याची आई आशाबाई पवार यांना गावातील लोकांकडून जुगाच्या खूनाची धक्कादायक बातमी समजली. नगरदेवळा रेल्वेस्थानकानजीक रस्त्याच्या बाजूला जुगा रक्ताच्या थारोळ्यात पडल्याचे त्यांना सांगण्यात आले.
आई आशाबाई आणि इतर नातेवाईक तातडीने घटनास्थळी पोहोचले. समोरचे दृश्य काळीज पिळवटून टाकणारे होते. जुगा मृतावस्थेत पडला होता. त्याच्या कपाळावर आणि चेहऱ्यावर जखमा होत्या. जवळच रक्ताचे डाग असलेला दगड पडलेला होता. ज्या मुलाच्या कमाईवर आणि अस्तित्वावर एका आईच्या आयुष्याचा भावनिक आधार उभा असतो, त्याच मुलाचा असा अंत झाल्याचे दृश्य तिच्यासाठी असह्य होते.
जुगा पाचोरा येथे जातांना आणि आल्यानंतर त्याच्यासोबत धर्मा सातत्याने फिरत असल्याचे त्याच्या मुलीने पाहिले होते. त्यामुळे त्यानेच हा खूनाचा प्रकार केला असल्याचा संशय जुगाची आई आशाबाईने व्यक्त केला. घटनेची माहिती मिळताच भडगाव पोलिस ठाण्याचे पोलिस निरीक्षक महेश टाक आणि त्यांचे सहकारी पोलिस उप निरीक्षक सुशिल सोनवणे, पो.कॉ. दिपक पाटील, कल्पेश अहिरे, मनोहर पाटील, जितेंद्र राजपूत आदी नगरदेवळा रेल्वे स्टेशन वस्तीनजीक असलेल्या घटनास्थळी दाखल झाले. पोलिसांनी घटनास्थळ आणि परिस्थितीची बारकाईने पाहणी सुरू केली. नग्नावस्थेतील जुगा याच्या मृतदेहाजवळ पडलेला रक्ताचे डाग असलेला दगड आणि घटनास्थळावरील इतर बाबी तपासाच्या दृष्टीने महत्त्वाच्या होत्या. तपासा दरम्यान जवळच असलेल्या मक्याच्या शेतात धर्मा भाता पवार हा भयभीत अवस्थेत लपलेला आढळून आला. त्याच्याकडे दोन कबुतरे आणि काळ्या रंगाची बॅग होती. त्या बॅगेत मयत जुगाच्या तोडलेल्या दातांचा जबडा पोलिसांना आढळून आला. पोलिसांनी धर्मा याला ताब्यात घेऊन पोलिस ठाण्यात आणले. दुसरीकडे, जुगा याचा मृतदेह शवविच्छेदनासाठी भडगाव ग्रामीण रुग्णालयात पाठवण्यात आला. आठशे रुपयांवरून सुरू झालेल्या वादानंतर घडलेल्या या घटनेत संशयिताचा शोध, त्याची बॅग आणि त्यातील बत्तीशी या बाबींमुळे प्रकरणाचे गांभीर्य अधिक स्पष्ट झाले.
आशाबाई पवार यांच्या फिर्यादीवरून भडगाव पोलिस ठाण्यात संशयीत धर्मा पवार याच्याविरुद्ध खुनाचा गुन्हा दाखल करण्यात आला. गुन्हा क्रमांक 288/2026 नुसार भारतीय न्याय संहिता, 2023 मधील कलम 103(1) अंतर्गत नोंद करण्यात आली. या प्रकरणाचा पुढील तपास पोलिस निरीक्षक महेश टाक यांच्या मार्गदर्शनाखाली पोलिस उपनिरीक्षक सुशील सोनवणे व त्यांचे सहकारी पोलिस कॉन्स्टेबल दिपक पाटील यांनी सुरु केला. घटनेमागील नेमकी परिस्थिती, वादाचा क्रम आणि इतर पुरावे याबाबतची अंतिम वस्तुस्थिती तपास व न्यायालयीन प्रक्रियेतून स्पष्ट होईल.
जुगाच्या मृत्यूने अनेक प्रश्न उपस्थित झाले आहेत. पैशांसाठी सुरू झालेला वाद जीवघेण्या हिंसाचारापर्यंत का पोहोचतो? रागाच्या भरात केलेल्या कृत्याचे परिणाम किती भयानक असू शकतात? आणि मद्यपानामुळे विवेक हरपला, तरी एखाद्याचे आयुष्य हिरावून घेण्याची जबाबदारी संपते का?
आठशे रुपये आज खर्च होतील, उद्या पुन्हा कमावता येतील. पण गेलेला जीव परत आणता येत नाही. एका कुटुंबाचा आधार हिरावला जातो, आईच्या आयुष्यात न भरून येणारी पोकळी निर्माण होते आणि आरोपीला कायदेशीर परिणामांना सामोरे जावे लागू शकते.
या घटनेचा सामाजिक संदेश स्पष्ट आहे. पैशांचा वाद संवादाने सोडवा. रागाच्या भरात हिंसेचा मार्ग स्वीकारू नका. मद्यपान, क्षणिक संताप आणि पैशांचा हव्यास यांची परिणती कधीही गंभीर गुन्ह्यात होऊ शकते. आठशे रुपयांचा वाद संपला असेल पण एका मृत्यूने मागे सोडलेले दुःख आणि अनेक अनुत्तरित प्रश्न मात्र दीर्घकाळ कायम राहणार आहेत.
